|
|
|
|
|
||||
| هيئة إدارة تحرير مجلة عاشقة الصحراء التي تعنى بقضايا المرأة العربية والأدب والفن | ||||
|
سامحيني ايگولْ.. ............. بقلم الشاعرة والاديبة وفاء عبدالرازق
أشُو خلْني أعدهن
چَم ليلة چَم يوم
اوچَم جِبتْ الدِگايگْ كلهن اشموعْ
إذا خانك سؤالك چان سكران
وأنَه اليشهد عليَّه مِلحْ الِدموعْ
أسأل لوَنْ جمرك واللَّهب تذكار
والمبلَّل ينام بخوف منگوعْ
إنتَ الچان الك كل يوم حالْ اوحالْ
و أنَه الشاري هواك بسّوَم مبيوعْ
كفُر دمع اليحب مايشبه الويَّاه
او يتسرسح ابنِصّْ الليل ملسوعْ
وِحدة اتشيل وِحدة مْناهَتْ اويَه الحيلْ
وسَيرَن عَ البگت تتناهن اتلوعْ
حِبلة جروح خدي اوتطلگ امنْ اسنين
او نزلن عَ المْصدِّي الچان مَهجوعْ
سَكتة تراضي سَكتة تعاند الشمَّات
إشْ، لا يدمدم دَمچَن المسموعْ
عُمُرْ وانَه انشلع خبرة امحمّصة الذاتْ
او يجي تنَّور ذاتك ماكله الجُوعْ
داينتك دِليلي ودَهرْ ما ردَّيتْ
ويگولون الوفه بالدَين مرجوعْ
عُمرْ وانَه الضم واخيِّط هاي مِن هاي
وكلما أرگعك الگى الخيط مگطوعْ
بعد وتريد اسامح عِدلي ياهي تريد؟
فرِدْ واحد يسامح لو تريد اجموعْ؟
يَمَن طفَّيتني واكتّلِتْ بيَّه اضوايْ
أجْلي الغارن اعْليَّه وأجيك انصوعْ
البَسْني امْنْ اشبهك ذهب بالدِگمات
او مِنْ غصبن يجيك الزيج مَدروعْ
اوتِريد اتْسامحك شجرة اليهواكْ
يمگضَّبْ اغصاني والجَذِرْ مشلوعْ؟
يَمنْ شيََع اگزازك كل صِحيحْ اعضاي
اشلون اتسامحك دمعاتْ الضلوع؟
او هاي التِعَلگتْ صَخر ة يَم "سيزيف"
او ياخذها هواها اصْعود وارجوعْ
الكاتب:
سكرتيرة التحرير مريم حمدان بتاريخ: الإثنين 06-05-2024 07:06 مساء الزوار: 260
التعليقات: 0
|
