الصاحب اللي يظهر انه خذلني

قولو له اني وافي(ن) ما خذلته

حتى ولو قرر بأن يعتزلي
مهما حصل منه ابد م اعتزلته

عمار يا وقت(ن) نفس له جعلني
علما" بأني كل شي(ن) جعلته

ودو جوابي له ولو ما سألني
أموت ظامي قطرت(ن) ما سألته

ماهي قساوه والله اللي جبلني
ان الوفا مع دم عرقي جبلته

وشلون انسى من بعطفه شملني
وليا خطا بالصفح كله شملته

اللي بحكمه يدري انه قتلني
لو هو بمرما بندقي ما قتلته

واللي من احزان العمر هو نشلني
الموت منه لو ب يدي نشلته

مدري بلحظه ليه عنه فصلني
عني رغم ظرفي ابد ما فصلته

واللي على كيفه وأمره وصلني
انا اشوف الموت اذا ما وصلته

واللي بحبه الف عاذل عذلني
هو كيف يحسب زلتي لو عذلته

لو هو على عفويتي ما قبلني
رغم الجنون اللي سكن به قبلته

ودي يطول القاف لكن شغلني
الصاحب اللي ما اظني شغلته

واذا بحكمي جيت عجل وخذلني
انا عزاي اني ابد ما خذلته

طير مجد