سيبوها لأهلها
حالة ملل
كد و كلل
العمر راح
راح العمل
فين الجميل
ما فيش دليل
إنى عشقت
و إيه حصل
شمس إختفت
طريق إتمحى
ضهرى أتحنى
والأجنحة منها
سقط ....
الريش
صبح مافيش
غير وشوشه
خاف إرتعد
مات الولد
م المدرسة
سقط القلم
فى تحية علم
إختصرت عمرى
ف لحظة ندم
وذكرى مرة
على كراسة
كتبت كلمة
أحبها
كانت هناك واقفة
فى صف جمبى
لابسة طرحة مزركشة
والدم غرق جسمها
معرفتش حتى أضمها
ولا أحس بحضنها
كتروا الغيلان ..يا غُلبها
تقصد تقول يا مُرها
هرب الكروان من عشها
وهاجم ولادها الغراب
وسرق فراخها وحلمها
فين قمحها
ليه دمعها
يغسل وشوش أهلها
يا جرحها
يا قهرها
يا ما نفسى
أرقص يوم فرحها
ليه ضهرها
صبح ممر للديابة
تعوى ترهب أهلها
هوة الكلام كمان حرام
حرام بالقهر تزيدوا زلها
أنا إبنها
صعبان عليا جرحها
خدوا من عمرى
أد عمرى بس سيبوها
سيبوها تانى لأهلها
وحشنى حضنها
ترجعلى تانى
تجرى ...تنادى
تقول بحبك
تقول وحشانى
سيبوها هية ورايها
هى كده
عارفها أنا
إشمعنا أنا
علشان عاشقها
من كام سنة
تعرف أنا
بتبسم فى عز ظلمها
وأكتب على ضوء القمر
أجمل أغانى فى عشقها
وأبكى على الى راحوا
فدا ترابها والإبتسامة
مرسومة على وشها
تودع حبيب يجى ألف
وألف بركة عليهم
حبها
بس سيبوها لأهلها
تغزل غناوى فرحها
تلملم جراحها
تلم شملها
مين إلى قال إنها
حزب وجماعة
مش كده
حرام تزيدوا جرحها
ليه عقولكم
مش فاهمة عقلها
شوفوا جمالها وسحرها
ساعة عصارى
على نيلها وشطها
ولا غناوى مراكبى
شدى يدندن على ناى
وقلبه يجدف فى نيل صبرها
حتى الصبايا راح صبرهم
من الإنتظار آخر النهار
فى المشربية
قاعدة الصايبة
تقول عريسى جاى
تغزل ضفايرها
باغانى حب وغزل
تغسل دموعها
حلمها
إنها يوم
تجرى تجهز
تطبخ وتمسح
وتحلم إنها
تترمى أول ما الباب ينفتح
فى حضنه وتنسى نفسها
مش بقول سيبوها لأهلها
مين إلى قال إن الولاد دمهم
حل القضية
ليه بالقتل تسودوا وشها
وتحرقوا قلبها على ولدها
حرمتوها آذان الفجر
غيرتوا تاريخ ليلة القدر
وليلة عاشورة
واليلة الكبيرة
دى مصر مافيش
فى إيمان أهلها
سيبوها لأهلها
محمد حسانين
|
|
|
||||||||||||||||||||||||||||||||||||||
|
|
||||||||||||||||||||||||||||||||||||||
  المشاركة السابقة : المشاركة التالية 
 |
|
|
|
|
Copyright©2016 All Rights Reserved
