في ليلٍ اظلم خاشره صوت ذيبه
اخذت اعدّ ابيات وا اخلي ابيات

انقى عيون المقديه والمصيبه
وارفع مقام الشعر بين المقامات

سلام ياروس الرجال الصليبه
سلام يا عطر النبا والمسرات

سلام يا راسٍ ملكنا بطيبه
سلامٍ اكبر من جبال السراوات

سلام يا قرمٍ حسبني قريبه
علاقته تمتاز بين العلاقات

ياصاحبي لو للصداقه ضريبه
العمر يرهن دون خوّتك تارات

الخوه اللي كالجبال المهيبه
ياما تواجه من شبى العذل غارات

ولا اهتمّت لهرج العذول وصخيبه
ولا حسّبت لاهل الردى والملامات

وخوّه تلاشت يوم وقع المصيبه
اغسل يدك من شخصها 7 مرات

يقتل ردي الفعل صوت المريبه
ويفضحه بين الناس كثر التلفّات

ويطلق حجاجك فاللّيال الصعيبه
اللي يشوف الموت دونك سلامات

اهل القلوب الطيّبه والرحيبه
اللي يقول ابشر وحاجتك قد جات

خذهم رصيدك للسنين الشهيبه
وادفن غلاهم في ثرى الروح بالذات

خذني كفاتك للّيال النشيبه
في ضيق شخصك فالسفر فالمهمات

ومن حلو وقتك لين صالي لهيبه
انا معك للفرح ولا الملمّات

والرجل من مرباه حتّى مشيبه
اما امتطى للعزّ ولا المذلاّت

جابر الربعي

حي الجواب اللي عجولٍ نديبه
من سرعته مايعترف بالمسارات

مافيه شي بالكون يرصد دبيبه
تنقّله من خفّته ماله اثبات

ماله شبيهٍ واصفه يهتدي به
يسبق بريق الضوّ وش عاد الاصوات

قبل القريب اللي بعيدٍ يجيبه
وبعالمه ماللزمان اعتبارات

صنع الخواجة جعل ربّي حسيبه
مسلّطه ربي على المستحيلات

ماعاد بقّى للغرابة غريبة
كم له يشكّل واقعه بالخيالات

مشربك العالم بشبْكة عجيبة
حياتنا متوزعة عبر شاشات

فيها مواثيق الحبيب وحبيبه
وفيها عقود المصلحة والمعاشات

وفيها وصلني والقمر في مغيبه
وقت السحر والليل باخر سويعات

مكتوب وافي والمدايح نصيبه
ماتوفي لما فيه كلّ العبارات

للصاحب اللي قبل ينطق صحيبه
يفهم مراده ويتلمّس لحاجات

واذا اعتزى صفّت بعينه كتيبة
لاقدامهم تبقى مكانه علامات

طبيعته والنّبت بارضٍ خصيبة
يسقونه الجدان قوّة وصملات

عن مدح متبادل كأنه يعيبه
يكرم وتكرم وقفته ماضي وآت

يكفي بانه والضروف العصيبة
اشتات والايام ماتجمع اشتات

تهابه الايام لو خلي جيبه
ماتامنه لو كان من ضمن الاموات

محبوب فهيد