سلام للأرض والانسان باسم الحياة
سلام لاواصر القربى واصول العُرا

سلام لآدم والاستخلاف فِكر وبناة
سلام لحروفنا قبل الكُتب والقرا

سلام للي على صنع الحضارة وصاة
في كلّ منحى كتايبهم تتابع سِرا

مسهلين الصعاب ميسرين الغواة
مكحلين الثّريا من اديم الثّرى

منورين الظلام مطوعين العصاة
من شجرة الخلد لين اشراقة (اقرا) حرا

ياحرف قم للمعلم قبل طيّة رشاه
سنينه اللي تشابه وقفته تقدرا

رسالته اول حروف الوحي من سماه
ذكر القلم قبل ذكر السيف والمنبرا

ياسادة العلم وانتم فيه مثل القضاة
انتم بنوره تقدّوا حذفة الاعسرا

فرسان لو كان ماعشتم حياة الغزاة
في كل ميدان طاريكم ياعز الطرا

الى هنا واتمرد واعكس الاتجاه
مانتم بحاجة مديح وكل حيٍّ درى

رميت في البير خلسة قبل ما اشرب حصاة
لعلي ادرك بسمعي فوق ماقد ارى

هنا براسي غرايب تلفت الانتباه
تمردت اسئلتها غصب لو تزدرى

ياسادتي ليه ينسى المرسم اللي محاه
ويزيد عمق وفصاحة كلّ ماينبرى

واذا سمعنا لما نقراه صوت اش وراه
لاخامر الروح كنّه نبع روح وجرى

يا اساتذة سحر الاقران اكشفوا لي غطاه
اللي يطوّل قصير وطايله يقصرا

كيف الألم لاقدم يصبح لذكره حلاة
العود بالذكريات يورّق ويزهرا

احترت واخترت عن مدح الدها في الدهاة
انشد بقايا الورق عن سرّ في الدفترا

اما انتم ان كان فالتعليم والا الحياة
وافين باسم الزمالة والذمم والعُرا

محبوب فهيد