يانايمه بقلبي لك اليوم مُدّه
نامي ولا يطري على بالك الخوف

هذا يميني لك وعهدي امدّه
مابوق بعهودك ولايصيبك الحوف

اللي انكتب في جنب سرجه (تحدّه)
خيلٍ مدرب ع الحرابه ومعسوف

مايهاب ضلماء ولا المنيّه تردّه
ياطا بحوافيرة عراقيل وجروف

لايغرك اني ساكنٍ وسط جدّه
انا بدوي واعشق روابيك يانوف

بعد المسافه زاد بالشوق حدّه
لوكنتِ وسط الجوف والا ورا الجوف

ياللي سبى عقلي وجنّنّي ودّه
ارحم وليفك ياغناتي وبي روف

ويلاه لوشافو المخاليق خدّه
كان نصهم ضاعوا بوديان وشعوف

ريمٍ تربى في ذرا حكم جدّه
حرير يفرش له ولا يقبل الصوف

مافيه عذاراء تشبه لحسن قدّه
والعنق ليّن بايناتٍ به عطوف

نقش حروف اسمي على كف يدّه
وانا نقشت اسمه على واضح الشوف

فاح البخور العود وارياح ندّه
ورد وزهور وعطرها اسمه ريوف

والله مااخشى منه للقلب صدّه
ماحنّا زوّار الهوى حسبة ضيوف

حنا نعرف الحب من عهد جِدّه
وبيدنا دونه بواريد وسيوف

ولامشينا في بالخطأ بيوم ضِدّه
تشهد علينا افعالنا بكل معروف