ليل الشتاء يا ذياب تبكي غيومه و اتطايرت بعيوني اوجوه و انساب

وجه ٍ سكن جفني بصحوه و نومه

و وجهٍ بشريانه عمر خافقي ذاب

و وجه ٍفراقه ليل ضاعت نجومه

ووجه ٍحضوره يحرق قصورالاتعاب

مشتاق للصحراء و لفحة سمومه

و لمة اهل و اخوان و معاشر اصحاب

في ديرة ٍ ما حولها انسٍ رخومه

فيها البختري و النفل و الشعر طاب

و ان ضاق صدري رحت ست النعومه

ست الحلا و الطيب و تاج الاحباب ..

امي ولابه مثل حظن الامومــه

لو بست رجليها جرح خافقي طاب

يا ذياب احكي صاحبي وش علومه

يذكرني والا قسمته عند الاجناب

عشرة سنين ٍ بين حسره و لومه

لي جيت ابا ارقد كن بوسادتي داب

شفت الليالي شلون تصبح ضلومه

مات العمر مخنوق برحم الاغراب

اقول بكره و بكره ما حان يومه

و زرع ٍ سقيته سنين محصوله اتراب

مبحر مع الاشواق كل ساع عومه

و المشكله ماني بسبّاح يا ذياب

ماغير شعري عل ربي يدومه

صاحب يخاويني و لو ما هو جذّاب

لو ردت ابيعه لخبل ماظن يسومه

كله حزن و افراق و اطعون و احراب

طال ارمضان الشوق و لا عفت صومه

ما اترك ايماني ولو قطعة ارقاب

و دام الامر لله ليله و يومه

من هو يقول ايدوم هالحزن كذاب

بكره يرد المغترب وسط قومه

و الشمس تشرق و الفرح يفتح الباب

بكره الشعر يا ذياب يترك همومه

و بعون ربي ما امر سيرة غياب

عايد مرزوق العويس - المانيا