|
|
|
|
طلعت حــرمة وهي حامل من بيتها عقــب ما ضــربها جــوزها وتونت وجوزها ظن انها راحت تقضي حاجة أو تزور حدا الحريم وتعود ، ظب الليل وهــي ما عــودت قال أصـبر شوية وهو ما يدري ان الحرمة طلعت من بيتها زعلانة ومشت بالصحرا تنـوي تزهم يم اهلـها ، بقى جوزها ينتظر لما طلع النهار وحينها ركب الناقة وطلع يدور عليها لما وصل اهلها ونشد عنها بس ما لقاها ، تاري الحرمة تاهـت بالصحرا وظب عليها اللــيل والمصيبة ان ســاعة الــولادة جتـها وجابت بنت بس هالمسكينة صار معها نزيف وحست ان منــيتها قربت ، لما طلع النهار قرب يمها رجّال معه ناقة يـدور على بِل ضـاعـت منــه قــرب صوبها عـقـب ما شــافها وهو يحاول يساعدها بس الحرمة كانت تعاني من النزيف وقالت له : - أنا وكاد ميتة ومعي هذي البنت تــراها أمـــانة عنــدك ولن سـلمت ترى اسمها شيمة والبنت تراها بنت فلان وعدت اسم ابوها . تموت الحرمة ويدفنها الرجّال وياخـذ البنت وتابع مسيره يدور بِله وصادف ان لقى بيت توجه عليه ونـــزل عن الناقــة وان فيه الحـرمة سولف معاها وعلمها ان البـنت بعدها رضيعة وطلب منها تعتني بيها لما يعـود ، وافقت الحرمة اللي خذت شيمة وانطاها شوية نيرات مقابل هالشي وراح الرجّال والحرمة تظــن ان البــنت بنتــه وتوكــدت انه غــير يعـــود ، مرت الايام والرجّال ما عود حيث انه عود لديرته عقب ما حس بالوجع والمرض وعلمهم انــه لقـــى بنت وهي أمانة برقبته وحطها عند حدا العربان وعلمهم بالسالفة كلها وخبرهم انه عقب ما يشفى ينــوي يروح يجيبها من عند ويربيها بس الموت جاه وما علم باسم العــرب اللي البنت عندهم وكان له ولد واحد اسمه فواز . تمـر السنين وتكـبر شـيمة وتكون قــمة بجمالها وكبــيرة بعقــلها والخير ما لفى يم اللي ربوها غير من جتهم شيمة فكثر حلالهم وزاد خيرهم وكانت تقوم بخدمة من ربـوها هـي اللـي تجيب الما والحطب وغيره ، أمها اللي ارضعتها كان لها ولد وحيد اسمه ماجد وتمــنت انها ما ارضعت شيمة لجل تكون من نصيبه ، ماجد اخوها بالرضاعة كثـير ما يمــزح بمــزح ما يليـق بين الاخو واخته وشكته لبوها من الرضاعه ولامها بس دون فايــدة لين طلعت مرة تجيب مية ومـــا عــودت وركـب ابــوها مـن الــرضاعة الــذلول وزهـم يــدور عـليها بس ما لقـاها وعود لديـــرته ، تغـيب شيمة عـقـب ما تركت اهلها اللي ربوها لما وصلت عقب اربعة ايام لبيت كان بيه عجوز ودخلت علـيها وعلمتها انها ضايعة ، رحبت العجوز بـيها واكرمتها وقامت بواجبها لما عود ولدها اللي هو فواز ونشدها عن عربها بس شيمة قالت الضيف له ثلاث ايام وعقبها اعلمكم بسالفتي ، مضت الايام الثلاثة وعلمتهم شيمة بسالفتها وقالت : - انا ما دريت بسالفتي غـير قـبل سنة من امـي اللـي ارضعتني وانا ما تركت اهلي اللي ربوني غير خوف من عار يلحقني من ورا اخوي بالرضاعة اللي ما حدا راضي يردوا . سالفتها اذهلت العجوز وما صدقت اللي تسمعه عقب ما توكدت انـــها البـنت اللي علمهم بيها جوزها قبل يوت وقالت العجوز : - الرجال اللي خذاك وتركك عند الحرمة تربيك هو جوزي أبو فـواز وانه علمـهم بالسالفة كلها قبل يموت بس ما علمهم بالمكان اللي تركك بيه . البنت بعد ما صــدقت اللي سمعته وبقــدر ما انسرت قامت تبكـي من الفرح وتبسمت لها العجوز وقالت : - وانت بنت فلان بن فلان من القبيلة الفلانية . تفاجئت شــيمة أكــثر باللي تسمعه وهي تلـــد بوجه العجوز وفــواز ولجل ان فـواز كان موصوف بالعقل والدين وقال : - تريك امانة ابوي وامانة ابوي انا اتحملها . عاشت شيمة عنــدهم وهم ما يملكون غـير شوية شويهات بارض قفره وعقب ايام نوت العجوز على الرحيل لجل شويهاتهم بس شيمة طلـبت منهم يصبروا وان الخير جاي ، وافقوها الراي وما لفــى المسا غــير ان المطـر جاي واروى الـــبلاد وكثـرت المية والــربيع بـدا يظهر والشويهات زاد حليبها ، توكلت شيمة بحلب الشياه وعقب عــدة شــهور صاروا يبيعوا السمن والجبن ويشتروا التمر والقهوة والخير ظهر عليهم والحلال ولّـــدّ وزادت اعــداده ، مـع مرور الايام تجوز فواز من شيمة ومضت السنين وماتت العجوز والله ارزقهم العــيال وصار عنــدهم حلال ما ينعد . مرت الايام وبيوم جاهم رجل يطلب رعية وانـــه يريدها لعجوز وشـايب يشكوا من الفقر والقلة وقال فواز للرجل : - الحلال والخير اللي تشوفو لحرمتي وهي اللي تامر بكل شي والحين اعلمها . قام فواز ودخل المحرم وعلم شيمة بسالفة الرجل ويوم انها لدت وشــافته تفاجـــئت بيه وقربت يمه بالحال وقالت : - انت ماجد ولد فلان . لد عليها ماجد وقال عقب ما تبسم : - صدقت وانت وكاد خيتي شيمة . قالت وهي تهون عليه وتخفف من اللي بيه : - اي انا .. وانتم يا ماجــد أهـلي وش ما صار والحين تاخذ الحلال واللي يلزمك وانا عقب ايام اكد يمكوا . بكى ماجد من شـــدة الفرح وبالحال حملته من الخيرات والارزاق الكثير وراح لما وصل اهله اللي شافه الحلال قــرب يمهم ونــزل ماجد بالخيرات وتــرك الحـــلال قـدام البيت وعلمهم بالسالفة وعقب ايام وصلت شيمة عليهم وبنتلهم بيت كبير وعبته من كل شـي ولما شافها ابو ماجد صار يعتذر منها لجل اللي صار قبل وقال : يا عــيني خِـذي ما اقــوله وشـــوفين اعلمـك باللــــي بقــــى خافــــياتِ لما سمعت شيمة القصيدة من ابوها اللي رباها تاثرت ردت عليه بالحال وقالت : ابوي لا يــكربك شـــي مضـــى ويــن لك الجميل اللي مضــى وفـاتِ رجعت شــيمة لبيتها مع جـوزها فواز وعقب ايـام جاهم شايب ومعه ولدين وبنت وامهم ونزلوا عندهم ورحبوا بيه وقامـوا بواجبه وعـلمهم انه صار فقــير عـقب الجــرب ما ذبــح كل حلاله وتعلل الشايب عند فواز بالليل وفواز يريد يعرف هو من ايات قبيلة وقال : - علمني من ايات قبيلة انت . عـلــمه الشايب انه من القبيــلة الفلانية ولــما سـمعت شيمة الشايب يعلم بقبيلته انسرت ونادت على فــواز وقالــت له يطلب من الشايب يقص ســالفته ، عـود فواز للشايب وطلب منه يعــلمه بسالفته كلها ، بــدا الشايب يقص عــليه لما وصل عند حــرمته اللــي عمـــاه الشيطان وضربها وفلت بليلة باردة وكانت باخر حملها وقال : - ما كنت اظن انها تتركني وتفل ودورت عـليها وما لقــيت لها اثــر وعقب عدة ايام مرت وانا اسير بالصحرا ادور عليها شفت جثتها يابسة عـقب ما بينتها الريـــح اللي نسفت الــتراب عن قبرها وبالحال حفرت لها قبر ودفنتها وانا ابكي على الخطا اللي سويته بحقها . قام يبكي الشايب من جديد وبالحال بينت شيمة وقالت : - انت فلان بن فلان . لد عليها الشايب وتغير وجهه وعلمها انه هو بنفسه وبالحال ضمته وهو يلد عليها مهو مصدق وهي تبكي وتقول وين انت يا بـوي ، الشايب وفواز مهم مصدقين اللي يشوفوه وعقب ما انتهت من ضمه عقب ما عَرَفها رادت تغــير جــو الحزن اللي هم بيــه وقصت عـليه شـيمة كل السالفة وقالت : - له ابشر بالخير . وبنت لهم بيت وانطته من الحلال والخير وعاشوا مع بعض عقب مما فرقتهم الدنيا . وسلامتكم الكاتب:
اسرة التحرير بتاريخ: الجمعة 02-12-2016 08:04 مساء
الزوار: 7091 التعليقات: 0
|
Copyright©2016 All Rights Reserved
