سالفتنا عن مرة فرقت بين الـــولد ووالــده والأخو واخوه – بالتعاون مع أمها – وهذي السالفة قديمة تناقلـتها الأجــيال حتى تكون عبره للي يمشوا ورا النسوان اللي يبعدن الرجل عن مهاجي الـــرجال تقول السالفة :

       هناك قــبيله لها شــيخ ينقاله درداح وهـاظ الشيخ معروف بالقوه والـكرم وعــزة النفس يعني رجّـال أجــودي وغانـم ، كان لهاظ الشــيخ ولــدين هم صــايل ونطاح وبنت اسمها كمايل متجوزة من ولد عمها ، صايل متجوز ومرته توفت عـقب ما جابت لـه بنت وبعد كم شهر مــن وفاة مرة صايل توفت أمه عقب ما لدغتها حية  .
      صـار بـيت الشيخ من دون مرة وبيت الشيخ الكل يدري انه ما يفظى من الضيوف وبليلة من الليالــي وهو يتعــلل مع عـيــاله قال :

يا عـيال لو يدخل علـينا ظـيـف ما نــقدر نقوم بواجبه واختكم عندها جوزها وعـيالها وحـلالهم ألله يعـينها .

لَد الشيخ على نطـاح وقال :

صايل مــا ودو يتــزوج ميـــر انت يا نـطاح تخيّر وحدى بــنات الشيوخ أو من عربنا وتزوجها قبل بيتنا لا يخرب علينا بـيد الفداويه .  

انسر نطاح وما صدق بهرج ابوه وقال له :

يا بوي أنا بخاطري بنت من عــربنا

قال ابوه :

 بـنت مَـن

قال نطاح :

جملة بنت فـلان .

ضحك الشـيخ وقال :

ما لقــيت غيـــر بنـت وبش الرجال الهافي انت تدري ان ما عنده مهاجي الرجال الزينين ومثل هيك رجّال بنته ما تنخاذ ، بعدين دور لعـيالك خـوال صيتهم طيب وانا سمعت ان امها لواقه ما تخلي بيت غير تلوذ عليه ونقالة حكي مغير يا ولدي خلك منها وتخير غيرها من بنـات الرجال الحشمين ،

تغير وجه نطاح وما رد على قول ابوه وقال : 

والله ما اخـذ غيرها

وصمم نطاح على رايه ولما الشيخ شاف ولـده مصمم  قـال :

يا ولــد الـناس قبل ما خلو شـي غير قالو بيه وقالو :

لاتاخذ البنت على زين خدها           أياك بنت النذل تاطا فراشها

وقالو بعد :

وصيتنا بنت النذل لا تاخذونها      يجي ولدها من تالى الخال خايب

       بس نــطاح ما رد عـلى كل هالحــكي وصمم ما ياخــذ غـيرها وابوه ما راد يكسر خاطره وجوزو اياها  ، عقب ما تجوزها بحــوالي الحـول راح نطاح مع عدد من الرجال يروزوا البلاد عقب ما قـَل العشب والما عندهم وغاب ايام عقبها عود ، يومن شافته جملة معود شقت ثوبها وفـرعت وصارت تصيح بالصوت العالي وتقول :

يا رب ادخلك ... يا رب ادخلك :

يومن وصل نطاح وشافها على هذي الحال ركض يمها يسال :

وش بيك وش بلاك ابوي مات اخوي صايل مـات

ما فـكر بالي تفـكر بيه جمـله اللي قالـت عقب ما هداها :

ابوك سـيّر معزوم عن صديق له واخوك ....

ثم ســكتت وقال لها وهـو خايف :

اخوي علامه مات

قالت :

يا ريت بس أخوك جاني المحرم وأنا لحالي يدور عندي الفاينه ولــما مــا شــاف شــي مـني شــق ثوبـي ورماني ع الـبلاد وزهم يم الحلال .

       نــطاح ترك جمـله وراح للشق والشيطان قام يوديه ويجيبه وهـو مهو مصدق ان صـايل يسويها وخوف انه يخسر اهله  نادى الفداوي وانطاه فلوس وقال له يدور بالعرب شقاق للبيع لجل يسكن لحـاله وطلـع نطاح من البيت زعلان لجل ما يشوف اخوه لن عود وما يدري حينها وش يسوي ، عقب نــطاح ما طلع عـود الشـيخ للديرة وقبل يصل شـافته جـمله وتركت الـبيت بالحال وراحـت لـبيت امها ، لما وصل الشـيخ سال عن الجميـع وان ما في حــدا بالبيت صـبله القهوجي القهوة وبحـينها وصـل نطاح ولما ابـوه شاف ان خاطر نطاح مهو زين سكت ونطاح ينادي على جمله وانها مهي البيت ، ارســل القهوجي يناديها مــن عند امها وعقب شوية وان جــمله معودة بوجـه اسـود مهو زيـن

قالها نطاح : وش بلاك سحنتك قالـبة ؟                                                                       

قالت : ما اقــولك غير ان الصبح جاني اخوك يدور الفاينة وتــالي النـهار عقب ما طـلعت عود الشـايب ولاذ عليّ بالمحـرم يدور الفايــنة بعد .

 طار عقل نطاح وقام يصرخ بالصوت العالي :

الله لا يبارك لا بصايل ولا بابـو صــايل يدوروا عند مرتي الفاينة .

       يومن ســمع الشــيخ الهرج وقـــع عـلى الارض ونطـاح خــذا مرته والشقاق ورحل عن الديرة ، عود صــايل للــبيت وان ابـوه مريض على الفراش ويـوم سال عــن اللي صار علــمه ابوه باللي صار وان بنت النذل ما تنظب ولا يتقرب عليها وعلمه ان اخوه رحل من الديره بعد ايـام درى الشــيخ وين صار نــطاح وارســل عليه رجّال يعلمه ان اللي قالته جمله كذب وهذي كلها سواليف جمــله وامها ، نطاح ما رد على المرسال وقال :

عيني ما تشوف واحد منهم وان شفتهم تراني ذباحهم

       عود المرسال وعــلم الشــيخ باللــي صـار وبعـد حوالي سنتين ثلاثه وعقب حدا التعاليل مسك الشيخ الربابة وقال 
يانـــطاح أفــهم قصتي يــوم أوصــيك     عســاك تسعــد مـن توافيق مولاك
النـمنــمـة والـوســوســـة لا تـباريــك      أياك لـــدغ الغافـــل أيـــاك وايـــاك
عندك أهرجوا بي وعندي هرجوا بيك     أصبحت تـبغـضــنا وحــنا كرهـناك
الضيف لا تنطيه مقــــرن عــلا بـــيك     خله صديقآ لك حبيــبآ إلـــيا جـــاك
لـــو هــو عـــدوك لا أتخلــيه يلـــغاك      حــذرك تخـلي ناصـى البيت يشناك
وأحشــم أخـوك اللي مع الربع يقديك       لا تنمســد مـا بــــين ذولا و ذولاك
لاتاخـذ اللــي تبعــدك عن مشــاحـيك       لو أنها زين الشمس ولا القمر ذاك
تصبــح كــما المجري تنبــح حواليك       ان طعتها بشور جارت على اخوك
أدب أبـنـــيـك لا تخلـــــيه ياليــــــــك       لن تمــرد صــار من أكـــبر اعداك
أحفظ حـلالك من مواهيــف تاذيـــيك       المـــال يخــلي النــــاس تنصـــــاك

       اليوم الثاني نادى الشاعـر وعـلمه بالقصيدة وقال تزهم يم  نطاح وتسمعو القصيدة عقب ما دلـوا عـلى الديــرة اللي هو بيها ، الشاعـر خذا القصيدة وزهم لما وصل نطاح وهناك علمه بالقصيدة كلها وقام نطاح يصفق يــد بيــد ندمـان على اللي سواه مع ابوه واخوه اللي سمعتهم مثل المسك عند العربان ، قام يفكر وش يسوي ثـم نادى على جمــله زعــلان وبصــوت عالـي

وجته جمله خايفة وقال الها :

والله والبيت اللي بنــاه الله لــن ما عــديتي الصحيح لاذبحـك وارمــيك للكلاب يا بـنت النذل مير علميني اخوي وابوي دوروا عندك الفاينة .

جملة خافت وتوترت وقالت :

انطيني الامان .

قالها : انطيك الامان لن عديتي الصحيح.

قالت : يشهد الله أن ابوك شيخ شريف واخوك ما شفت منه غير الطيب بس والله امي هي كل البلا ظلت تلعب براسي وانا مشيت بشورها وسويت اللي سويته وارجاك سامحني وغير اصير عصاك اللي ما تعصاك .

       يومن سمع نطاح الهرج ما صدق والشرر طار من عيونه من زعله على اللي صار بينه وبين ابوه واخوه وقالها :

منك ورا ترى النفس طابت عنك وانتي طالق بالثلاثه .

       قام يفــكر وش ودو يسوي لما راح الــزعل عنــه لــدّ على الشاعر اللي قاعد يرقب اللي يصير وسمعه قصيدة يوصلها لبوه يعلمه بيها عن كـيد النسا وكذبهن وقال :

يا والــدي يا والــــدي كيف أجازيك    يا جنــة الفردوس يا ابــــوي مـــاواك
أدمـــح لنـــا يا أبــوي ألله يحمـــيك    يسـعد حـــياتك في صبـــاحك وممساك
بــنت الهفيه عـــكرت كل مـا فــيك     القـلـب عافــــها ريتــها من فدايــــــاك
يحـرم عـليّ شــوفها وأنا ناصــيك     لزحف على صدري من الصبح لنصاك
يا والدي لا تحرمني من مراضيك      أريــد اقرب يابـوي وابوس ما طـــــاك
       وصــلت القصيدة للشــيخ وتحمد الله وعــقب ايام عاد نطاح لديرته وحب على راس ابوه واستسمح اخوه علـى الظن والـزلة وعاشوا مثل ما كانوا قبل ما تجي عليهم جملة اللي ابعدت عن الديرة هي وامها .

وسلامتكم