حطمتني تحطيم الاحلام بالروح
وماكفاك اللي حصل في حياتي

دمعي انسكب وانزف من آالآم وجروح
وعجزت اجمع بعد جُرحك شتاتي

أضحك معك والقلب بالجوف مذبوح
وهذي من اخلاقي واجمل صفاتي

اخطيت كم مره وانا اقول مسموح
وامشي على شانك بهيبة وثباتي

اقول يمكن تنعدل يوم ويلوح
يلوح لي بارق أمل في نجاتي

موجً تلاطم وسط بحرك بلا شروح
تشرح سبب واضح لاقناع ذاتي

اهدرت دمي للعدى صار مسفوح
وقمت. أسترجع معك ذكرياتي

أظهر لك الفرحه وانا بداخلي انوح
وانطر متىٰ ينُثر بقايا رفاتي

يااقرب قريبً لي تخليت وتروح
وانا اخفي جروح الظروف بعباتي

وانت تغني بالفرح دوم و تبوح
بوح العدوا اللي تشفّىٰ بعناتي

قررت ابعد واشتري غالي الروح
وان ماقدرت اقسم لاكتب وصاتي