قنطر يغني و انشطر
قلبي و شاقه الغاليين

ياليت ينعاد الوطر
وأجني زهور الياسمين

تبرٍ خِطَر خذني وبطر
ماراف يلي به سجين

عذب اللما حلو النظر
عين المهايا السارحين

الشين فيهم محتـظر
محروز بالغالي الثمين

أبيض خفا أسود شعر
والعود حنا و قور تين

الروح راحت له سعر
بعطيه من عمري سنين

يمشي دجر شهد الثغر
وأمشي معه مدري لوين

مهما لزمني مـا صغْر
يكبر و أفرش له الوتين

ما عاظني عنه نفر
بو خد عاشه كوكبين

أنساق له سوق الصفر
خمسٍ جداهم هايمين

يالحب عـ فوادي وقر
شلتك بزين ولا بشين

وراعي الهوى لو ينعقر
يسوى لوضاح الجبين

أشغلت روحي بالفكر
وينك لعينك مستكين

دامك لروحي محتكر
عالج وزا جرحي الدفين

ما تنسى لو بعتمر
وأصوم لله الاثنين

انا السما لك يالقمر
عالي معالي الفرقدين

يالزهر حبك مزدهر
و القلب أشقاه الحنين

بين المشاعر مشتهر
شهرة هلال الصايمين

مرسوم بعيوني صوّر
ما عوضوك الحاضرين

بندر غرامك ما زوّر
محروس و الخالق يعين

مطر ويا غيم المطر
وصل سلام العاشقين

لو من ملابسهم عطر
هاته و قلبي لك يدين

#خالد الشامسي