الوسمي اللي صادقٍ في وعيده
ماتبطي الرجوى بحروة لياله

البر يزهر لا وصلّه بريده
من دكّ رعّاده تربّع رماله

السّيل نجدي والتهايم محيده
سيلٍ عكس سيره ووسّع مجاله

ماصدّته شمّ الجبال العنيدة
ولاردّته متحدّية عن جَمالة

سيدة على تحقيق الآمال سيدة
صدق النّوايا يتّسم بالعجالة

يالله تديم الخير يالله تزيده
من يسقي العطشان كلٍ دعا له

بعض السّحايب تشبه المستفيدة
تعطي سخيّ القطر كنها تناله

مثل الكريم اللي لو القلب بيده
ماردّه لصدره وغيره يساله

النّادر اللي مايحصَّل نديده
منه الجمايل تنوخذ بالوكالة

وريث جدّه واعتنى في جديده
تجاكرو به طيب عمه وخاله

هذا الذي ينقال عنه الوليدة
من الوفا قوله يشابه فعاله

غيمٍ بلا قطر البدو ماتريده
والوادي الضّميان ماحِلّ جاله

يرجى السّحاب اللي بروقه وكيدة
في واديٍ مفرع بعيدٍ مخاله

محبوب فهيد