ألمحْك بين المنافي للأمل ديره

تشبه وميض الأماني في دجى شعري

أنشد خطايا الكتابة: وين تكفيره؟
تعبت اشيلك ذنوب وينحنى ظهري

بعثرتني بانقسامك للهوى غيره
بيني و بين الشكوك المتعبة فكري

يكفي نثرني الضياع بنفخ من كيره
يا كيف الملم شتاتي من ثرى غدري!

أضويت لك من سكوتي: (يالله الجيره)
أسلك مصير القناعه يبتسم عذري

قدمتي في سحورك للسهر ميره
سديت جوع الظلام المنهك بنحري

نسجت لك من هدوء الليل تكبيره
دمعة وقاري تُصلي ركعة الوترِ

كم رتلتني الليالي للسهد سيره
تخشع عيون الزمان و يندلق عمري

يسقي شغاف الكلام بـ مذقة الخيره
لوّ ارتشف من نكولك فيض من قهري

ياما تذوّقت لذة طعنتك شيره
بلّيت ريق المشاعر يرتوي صدري

أرخيت دلو المحاجر أرتجي بيره
يملى قفار السطور و ينتشي حبري

تعال اصبّك عتاب و أهرق اكسيره
يمكن اذوقك جواب معتق بطهري

سلامتكم

#ياسر_العتيق
؛ assmt.com