وطبعي أحب بصدق لكن كثير آغار

وراع الهوى في غيرته منهو يلومه.؟!

تجنّى عليّه صاحبي بالغرام وجار
فلا هو مواصلني ولا نكّس سهومه

بلاني بحبّه بلوة اللي بلوه بثار
يتيم ٍ تخلّوا عنه باللّازمه قومه

توفّا أخوه بساعة ٍ رمحها مكّار
وقفّا طليبه وأصبح أبعد من نجومه

وأنا منك يامدميني بصدّك البتّار
جريح ٍ نزف دمّه وحربتك مسمومه

رميت الغشيم ببحرك الهايج الغدّار
وبحر الغدر كيف آتعلّم على عومه.؟!

تجيبك لي الصدفه لو إنّ الحظوظ قصار
وتاخذك عن عيني نهايات محتومه

حياتك غموض وكلّها أسرار في أسرار
أو إنّك تغلاّ والتغلّي له سلومه

تغيب السنه عادي وترجع بدون أعذار
ولاهمّك اللي يشتكي لك من همومه

تسولف عليّ وتنشد عن آخر الأخبار
وأنا أخباري بدونك من الخير معدومه

عطيتك شواطي قلت لك إرسّ يابحّار
أنا لك وطن والكل راضي بمقسومه

ولكنّ غرورك طمّعك والزمن دوّار
وحتّى الزمن مابيّن بوجهك وسومه

كأنّه على كيفك يقدّم لك وتختار
تنقّى الّذي يناسب مقاسك من هدومه

تفنن بتعذيب الضماير ولا تحتار
ومن يعشقك لابد ماتكسر عزومه

تعلقت بك غصبن عليّه ولكن : صار
ومن يستطيع يرجّع شوي من يومه.؟!

تبختر بحسنك وإنت حسنك فتيل ونار
يحرم العيون المستريحه من النومه

على شانك الدنيا غدت كلّها شعّار
من أوّل سوالف رمشك إلـ آخر علومه

متعب النصار الشراري

السعوديه_محافظة القريات