تذكر يومنا الاول
تذكر قطعه من الروح
تذكر فتنة العالم
بعينٍ جتك ولهانه

تذكر يومك تنادي
على طيفي تجي وتروح
تخاف البرد يتعبني
صحيت بنفس شفقانه

سهِيت بوردة الجوري
وسلطانه وبيت الدوح
سليت بعالمٍ غافي
تسلّي ناس تعبانه

*شاعرة الذات*
*نورة الشمراني*

تداري نشوتك صبري
و انا كلي هوى و اصروح
يغني بليلة العاشق
جنون الحب و الوانه

تعال و جدد احساسك
على رف الحمام و نوح
و كفكف دمعة الشاقي
خذاه الوقت و احزانه

تذكر لين ما تطري
على بالي عطر و يفوح
ي كنك جالس فيني
تلف الروح بردانة

نسيت العالم الآخر
دخلت بعالم المسموح
غفيت بسكرة ابياتك
هويت بكل قيفانه

*د. حسن الخمعلي*

شعور الفقد يذبحني
وانا شامخ لصمتي فوح
مثل عود الخشب طيبي
جمرت الشعر باحزانه

شهقت بغصتي وحدي
وكفيت العتب والنوح
رضيت بقسمة ايامي
غريقٍ مات باوطانه

على قلبي عسل صافي
ولو يخطي وشمعه ساح
ابلعق باقي الذكرى
واذوق الشهد بلسانه

أنا الوافي أنا الصافي
انا اللي مارميت اللوح
انا الصابر على جرحي
وبخفي وسم نيرانه

*شاعرة الذات*
*نورة الشمراني*