ترجي بزرعك لي كبر تاخذ الزود
وامأمنٍ زرعك كلاب الجزيره

وكلب الصلب لا تآمنَه لأي مجهود
شوفه كبر زرعك وللغرب خيره!

يا تاج راسي يا سعد كل مظهود
ياحيف عادت هقوتي بك كسيره

ضيّعت كل تعبك مثل باقة اورود..
زينه .. ولا شمّيت شي من عبيره

امن اولٍ وانا احسبك شامخٍ طود
واثرك تحرّكك الهبوب الصغيره

يا ليث ربعك في لياليّها السود
الليث شاخ ولا بقى بس زئيره!

اتحقّر اخوانك لجل ترضي الخود؟
الخود ما قصّت لعينك ظفيره

الخود من يمشي ورى الخود مقرود
بالعون ماحوله بصر او بصيره

الخود لي صكّت فلا ترجع الذود
ولا يرجع المنهوب كود المغيره

ومن يكرم بدمّه لجل يكسب الفود!
لا خير في دمه ولا في مسيره

ومن حقّر اخوانه وهو خيهم العود!
يستفردوه الناس وايده قصيره

اخوانك اخوانك هل الطيب والجود
واحدهم ان صكّت يعادل عشيره

اخوانك اخوانك ولو من ورى احدود
ينصوك لو حالك عليله خطيره

اخوانك اعوانك بلا اي مردود
احزام ظهرك بندقك والذخيره

مادامهم حولك ترى اسهود وامهود
عمرك خضار و غيم روحك مطيره

وان عفتهم لو تزرع الخير والجود
قلبك قفار و ناظرينك جزيره

سجّل ولك عندي من الجود ماجود
ويكفيك عن كل التسايير سيره

من حقّر اخوانه وهو خيهم العود
يستفردوه الناس وايده قصيره