كم لك تنوح و تخنق الصوت مرتاب
ما كنّك الا سور حاوط خرابه

وش ينفعك والدار مكسورة الباب
وانت الفقير اللي (خلايجه) بابه

ارفع يدينك والبس الصمت جلباب
يسترك من عري الكلام و حرابه

اضحك بوجه الضيق كان الامل شاب
واحظنه في صدرك وقل مرحبا به

اضحك ولو ندري بهالضّحك كذاب
بعض المسائل طرحها هو اجابه

وارفع يديك وينزل الدّمع سكّاب
يغسل حزن وجهك وتخضر هضابه

لا تلحق ايامك مشاريه واعتاب
تبرد ثراك ان ما روتك السّحابه

بكره تعرف احبابك ان طحت منصاب
والقلب يدفا من يجمّر صوابه

ولا تخنق انفاسك فلا حولك اجناب
حفلة جروحك والجروح اتشابه

جَمعَة جروح احباب ..وجروح الاحباب
..الجرح منها شيخ دين وذرابه

هذي جروح امفارق اخوان واصحاب
ام الجروح الشامخه والمهابه

و هذا ولد جرحٍ من سنين ما طاب
وهذا ولد فرحٍ نسته القرابه

وهذي جروح استاطنت بأرض الاغراب
تبحث وطن راح و ذبحنا غيابه

لا اتلد لهم باجحاف واتطول الاحساب
هم فزعتك لا احتجت سيف الكتابه

دامك فضا ماهمّك الحزن سرداب
يا قوس ما تبكي بكتك الرّبابه

واصرخ وأقول.. وكني امروض اذياب
لو( آلفت) ك ( الْبِس) تبقى ذيابه

واشرح لك صدور القوافي وتنساب
مابين ضلعينك قصايد مجابه

وانت غرست الحزن في نضرتك ناب
وتهجر محطات الهنا لا غرابه ...

طيف الألم لو مر لك تفتح الباب
أثر الكريم ايجوع ما صك بابه