والقشة اللي خانت يدين الغريق
طاح الجمل منها و ضيع يمته

فرصة و لاحت مير مادل الطريق
واصبح حديث العالم المتزمته

والضامي اللي محتمل مالا يطيق
ما يشرب الما لين يارد جمته

( الصبر مفتاح الفرج ) درسٍ عميق
درسٍ وعته الناس غيب و صمته

شفني و انا مالي على الدنيا رفيق
ما فيه مجد الا رقيت لقمته

وشفني و انا شاعر كما الحر الطليق
يشهر بجنحان الفخر لا زمته

اسمه و قسمه منسب العز العريق
ضم المفاخر و المفاخر ضمته

الليا التفت خلفه لقى مجدٍ عتيق
مشرق و تشرق مع شروقه همته

بيني و بين العز ميثاقٍ و ثيق
متعلقٍ في ذمتي و بذمته

ماني مكلف بالزفير و بالشهيق
ما كل من يعطس لزوم اشمته

ما كل معدن لو تحصله بريق
اسمه ذهب لو الخلايق سمته

صدك و هجرانك عن اللي ما يليق
يكفيك هرج العالم المتشمته

و اذا صفالك فالزمن هذا صديق
فانته من اللي نعمة الله عمته