|
|
|
|
معاً ... نحو أردن خالي من النواب للكاتب زيد عبد الكريم محارمه الصحيح شي بخليك تحس بالوجع ... شعب جائع فاقع ... والبلد بدها تقع ... والمُوازنة كلها شحدة وخوازيق ... وأكثرها رُقع ... ورئيس حكومة ما خلى إشي من شره ... إلا وسعره رفع ... والشعب كل أنواع الرسوم والضرائب والجمارك ... دفع ... وطبعاً كل المصاري إلي انسرقت من البلد ... ما في شي رجع ... والي بالكثير سجن شهرين وطلع ... يعني هو ظل أزفت من هيك وضع ... والنواب بتهاو شو كيف بدنا نتساوى براتب الوزير ... وبين الراتبين نجمع ... والشعب قاعد يتفرج عليهم ويسمع ... شو ها الحكي ... وشو ها المسخرة ... شي يخلي القلب يفقع ...!!!!!!! تعال تفرج على نوابنا الكبار ... بدهم تقاعد من أول النهار ... يعني إلي بيسير نائب أقل شي صرف ربع مليون دينار ... حتى يخدم الآمة .. وطبعاً كله حكي وشعار .. يُلحون وبكل إصرار .. على العدالة والمساواة بينهم وبين الوزير بالراتب ... الأساسي ... يعني النائب راتبه 1500 أساسي وطبعا حط عليه الباقي ... ولا تنسى كمان ... السفر والمياومات .. والنمرا الحمرا والجوازات .. والعزائم والمناسف والمناسبات .. وأكيد الجاهات والصُلحات والعطوات .. وكثير من الامتيازات .. لكن مش عاجب .. وبدهم كمان قدهن إضافات ..!!!!! شو إلي عملوه للبلد إلي بدهم راتب وزير .. غير الحكي والهوش والتنظير .. شو عملوا للمواطن الفقير .. غير زيادة الأسعار والتحقير .. .. شو عملوا للي سرق أموال البلد غير هيك ربك كاتب وهذا إلي بيسير .. شو عملوا للصحة والتعليم .. غير انه ما في مخصصات والموازنة مش كثير .. وبالنسبة للإصلاح ومحاربة الفساد والرشوة والواسطة .. شو في تغير .. يعني كله حكي بحكي .. لا جديد يذكر ولا قديم يعاد .. ومع انه البلد أكلها الفساد .. وقال النواب جايين يدافعوا عن حقوق وأموال العباد .. لكن يا عزيزي .. الشعب بواد والنواب بواد .. الشعب بواد كله .. شوك .. وقرف .. وضنك .. وزفت وعذاب .. ووادي العز والترف فقط للسادة للنواب .. ...؟؟!!!! يا عمي من الآخر .. ما بدنا نواب .. ما بدناااااااا .. بدنا نضل بالفساد .. وأكل الهوا والعذاب .. بس بدون نواب .. وما بدنا إلي انسرق من البلد يرجع .. ولا بدنا حد يدافع عنا ومن مصاري الشعب يعبي كرشه ويشبع .. الواحد منكم من كثر المصاري .. صار يترع .. والمُصيبة مش راضي يقنع .. الوزير جابته الدولة موظف .. مجبورة تعطيه راتب .. لكن سيدي النائب .. ممكن نفهم مين إلي جاه الله عليك تجي وتسير نائب .. إحنا روحنا عليك على الدار .. وبُسنا ايدك تيجي تخدمنا وتسير نائب .. ولا أنت إلي ترجيت إلى يسوى والي ما يسوى .. وبست ايد الصغير قبل الكبير .. ودفعت مصاري كثير .. وجاي هسا تسير علينا كبير .. وبدك من مصاري الشعب تعوض كل المخاسير .. !!! كنا نتمنى على السادة النواب .. يطالبوا بالمُساواة بينهم وبين أبناء ها الشعب الطفران .. يشعروا معنا .. لأنه الدنيا خربانة .. والبلد طفرانة .. والناس أكثر من نصها جُوعانة .. وهم بس إلي بطونهم شبعانة ..!!!! ملاحظة .. بالأمس احتدم الخلاف بين النواب على مُسمى ما يتقاضوه من الدولة .. منهم من قال هو راتب .. ومنهم من اعترض وسماها مكافأة .. بس ما بعرف شو صفى اسمها بالأخير .. إذا حد بعرف ياريت يخبرنا .. يعمل معروف .. لأنه الموضوع كثير مُهم .. نعرف شو صار بالمُسمى .. هو راتب .. ولا مكافأة .. لأنه هون نقطة الخلاف .. .؟؟؟!!! الكاتب:
ابتسام حياصات بتاريخ: الجمعة 27-09-2013 05:39 مساء الزوار: 1593
التعليقات: 0
|
Copyright©2016 All Rights Reserved
