مات الضمير وذنب (قابيلنا) حي
و(اغرابنا)من كثرة الدّفن قد مات!!

العاقل إنْجَن ينده الحرب والغي!
والموت سيف ٍ قطّع احبال الاصوات

اليوم فقنا بالكرم حاتم الطي!
لضيوفنا نقطع رؤوس المروّات

اوحوش صرنا نستلذ اللحم ني
ونبني من اعظام الفقارى ولايات!

الحي يبكي مابقى منه لو حي!
وصوت اليتامى هز سبع السموات!

كيف اقرأك يا فرح والقلب أُمِّي؟
كيف العمى يوصف جمال الفراشات!

بحر الشعر ضامي كره شربة المي
من برقعك يا حر بين الحمامات!

كم معتصم من جا طعنّاه مقفي!
واليوم نصرخ وين اهل البطولات؟

ويا قلب متعبني كفى وش تبي في
خلك مع خلك بدار الخواجات

ما عاد لك عندي علاجٍ سوا الكي!
لا عاد تاخذني على الشرق سجّات

ما عاد تغري صاحبك جرّة الفي
ولا جحيم افراقهم يحرق الذات

كلي عطاش ولا اظن وصلهم ري
شب الذبول بورقة العمر آهات

ويا دمعتي بي اكبري واحزني لي
كثر النّجوم.. ولا تحدِّك مجرّات

تِفَرْعني مثْل الدِّجا لو خَنَق ضي!
وشبه الهدوء اللي حيا ف دار الاموات!

تكْسرني الحَسْره على طاري الخي
واعْبُر مع العَبْره بِعِبْره لما فات

القيد نار ولا تحرَّرْ من ايدي
والشِّعرِ يبدا من دُموع النّهايات!

والعالم اللي طاويَه القتل طي
بفتح شبابيكه بحلم المسرّات

عل وعسى جبران يتزوج ب مي !
وتنسج من خيوط السّنا بشت الابيات

وايرد ليعقوب العمر يوسف اشوي
وانْخط بحبر الفَرْح اجْمل حكايات

وأقلّب التّلفاز هاذي ورا ذي
عيد وفرَح والحُبِّ يملأ المحطّات